O conselleiro de Sanidade, Julio García Comesaña, presidiu o pasado 19 de setembro, no Edificio Administrativo de San Lázaro, o acto de toma de posesión dos novos altos cargos do seu departamento. Carmen Durán Parrondo, como nova directora xeral de Saúde Pública da Consellería de Sanidade; Jose Flores Arias, como novo xerente do Sergas; e Ana Comesaña Álvarez como nova directora xeral de Recursos Humanos do Sergas.

 

 O novo xerente do Sergas, Jose Flores Arias, é licenciado en Medicina e Cirurxía pola Universidade de Santiago, con premio extraordinario de licenciatura, e é médico especialista en Medicina Familiar e Comunitaria.

 

Flores Arias era, dende o 2018, director da Fundación Pública Urxencias Sanitarias de Galicia-061. Na súa traxectoria profesional ocupou diversos postos dentro do 061. Así, foi director asistencial, médico coordinador en 1999, e posteriormente, no 2000, xefe de sala. No 2004 pasou a desenvolver o posto de subdirector asistencial, e entre 2005 e 2008, foi médico das bases medicalizadas do 061 de Ferrol, Santiago e Pontevedra. Entre 2008 e 2017 ocupou o posto de xefe da base medicalizada do 061 en Pontevedra. Na súa longa traxectoria profesional tamén foi médico de urxencias no Hospital de Montecelo, e no Provincial de Pontevedra, no Hospital do Salnés e no Punto de Atención Continuada de Santiago.